ពលរដ្ឋខ្មែររាប់សិបម៉ឺននាក់ បាននាំគ្នាចុះផ្លូវដង្ហែសពលោកបណ្ឌិត កែម ឡី ពីភ្នំពេញត្រឡប់ទៅស្រុកកំណើតលោកវិញ នៅក្នុងខេត្តតាកែវ។ បើមិននិយាយពីភាពបញ្ហាតិចតួចដែលកើតឡើងនៅក្នុងដំណើរផ្លូវជាង៨០គីឡូម៉ែត្រនេះ គេសង្កេតឃើញថា ប្រជាពលរដ្ឋខ្មែរដែលចូលរួមនៅក្នុងក្បួនហែសព បានបង្ហាញពីសាមគ្គីភាពរវាងគ្នានិងគ្នាយ៉ាងជ្រាលជ្រៅជាទីបំផុត។ នេះគឺជាក្ដីសង្ឃឹមនៃឯកភាពជាតិ។ ហើយវាទំនងជាអ្វីដែលលោកបណ្ឌិត កែម ឡី ចង់ឃើញដូចគ្នាដែរ។
ពលរដ្ឋខ្មែររាប់សិបម៉ឺននាក់ បាននាំគ្នាចុះផ្លូវដង្ហែសពលោកបណ្ឌិត កែម ឡី ពីភ្នំពេញត្រឡប់ទៅស្រុកកំណើតលោកវិញ នៅក្នុងខេត្តតាកែវ។ បើមិននិយាយពីភាពបញ្ហាតិចតួចដែលកើតឡើងនៅក្នុងដំណើរផ្លូវជាង៨០គីឡូម៉ែត្រនេះ គេសង្កេតឃើញថា ប្រជាពលរដ្ឋខ្មែរដែលចូលរួមនៅក្នុងក្បួនហែសព បានបង្ហាញពីសាមគ្គីភាពរវាងគ្នានិងគ្នាយ៉ាងជ្រាលជ្រៅជាទីបំផុត។ នេះគឺជាក្ដីសង្ឃឹមនៃឯកភាពជាតិ។ ហើយវាទំនងជាអ្វីដែលលោកបណ្ឌិត កែម ឡី ចង់ឃើញដូចគ្នាដែរ។
កំណាត់មហាវិថីព្រះមុនីវង្ស មហាវិថីសហព័ន្ធរុស្ស៊ីនៃទីក្រុងភ្នំពេញ និងផ្លូវជាតិលេខ៣ បានក្លាយទៅជាសមុទ្រមនុស្ស នៅពេលដែលសពលោកបណ្ឌិត កែម ឡី ត្រូវបានគេហែចេញពីវត្តចាស់ឆ្ពោះទៅកាន់ខេត្តតាកែវ។ មនុស្សប្រុសស្រីក្មេងចាស់ ភាគច្រើនក្នុងសម្លៀកបំពាក់អាវស ខោខ្មៅ អមដោយរូបថតនិងសាររំលែកទុក្ខ ធ្វើដំណើរជាជួរៗ លាយឡំជាមួយព្រះសង្ឃដែលសូត្រស្វាធ្យាយជយន្តោ ជូនដំណើរសពលោកបណ្ឌិត កែម ឡី ដែលត្រូវគេបាញ់សម្លាប់យ៉ាងឈាមត្រជាក់កាលពីថ្ងៃទី១០កក្កដា។ អ្នកចូលរួមហែសពលោក កែម ឡី អ្នកស្រាវជ្រាវដើម្បីការអភិវឌ្ឍសង្គម មិនមែនមានតែអ្នកភ្នំពេញនោះទេ។ ក៏មានផងដែរ ប្រជាពលរដ្ឋមកពីតាមបណ្ដាខេត្តផ្សេងៗស្ទើរតែទូទាំងប្រទេស។កំដៅថ្ងៃក្ដៅហែងជះមកលើក្បួនហែសពដ៏ចង្អៀត។ ប៉ុន្តែទឹកចិត្តអ្នកចូលរួមមិនចង្អៀតឡើយ។ អ្នកជិះលើរ៉ឺម៉កដែលមានកន្លែងទំនេរ បានបបួលអ្នកដទៃឲ្យជិះជាមួយ។ មួយចំនួនយល់ព្រមឡើងតាមការបបួល ខណៈមួយចំនួនទៀតបដិសេធ ហើយស្នើឲ្យបបួលអ្នកដែលមានវ័យចាស់ជាង ឬនារីៗឲ្យឡើងជិះជំនួសវិញ។ រ៉ឺម៉កនិងម៉ូតូខ្លះទៀត ផ្ទុកពេញទៅដោយទឹកសុទ្ធ នំប៉័ង ផ្លែឈើ និងបាយកញ្ចប់ សម្រាប់ចែកបន្តដោយឥតគិតថ្លៃទៅកាន់អ្នកចូលរួមហែសព។ នេះ គេនៅមិនទាន់រាប់ពីការយកអាសារគ្នានៅពេលមានអ្នកខ្យល់ដួល ឬជួបគ្រោះថ្នាក់ចរាចរណ៍ ដែលកើតឡើងជាអន្លើៗនៅក្នុងក្បួនផងទេ។ ចំណែកនៅក្រៅក្បួន ប្រជាពលរដ្ឋទាំងស្រីទាំងប្រុសនាំគ្នាឈរអមសងខាងផ្លូវ ដៃកាន់ទង់ជាតិខ្មែរ រូបថតលោក កែម ឡី និងផ្កាឈូក ដើម្បីចូលរួមជូនដំណើរលោកបណ្ឌិត កែម ឡី ទៅកាន់ស្រុកកំណើតវិញ។ អ្នកខ្លះ ថ្វីត្បិតតែមិនបានចូលរួមហែក៏ពិតមែន តែបានចំណាយពេលវេលា រួមទាំងប្រាក់កាស ទិញទឹកសុទ្ធនំចំណីមកចែកឲ្យអ្នកដទៃយ៉ាងសប្បុរស។ នៅពេលស្ថានីយ៍ប្រេងឥន្ធនៈបិទទ្វារមិនលក់សាំងឲ្យអ្នកចូលរួមហែសព មានពលរដ្ឋសប្បុរសខ្លះ ទិញសាំងដឹកតាមឡានចែកជូនអ្នកដែលអស់សាំង ដើម្បីឲ្យពួកគេអាចរួមដំណើរជាមួយលោកបណ្ឌិត កែម ឡី តទៅមុខទៀត រហូតដល់គោលដៅចុងក្រោយ។ ក្រៅពីការចូលរួមរបស់ប្រជាពលរដ្ឋ អាជ្ញាធរមានសមត្ថកិច្ច ជាពិសេសនគរបាលចរាចរណ៍ ត្រូវបានដាក់ពង្រាយនៅតាមផ្លូវ តាំងពីវត្តចាស់ទៅដល់ទឹកដីកំណើតលោក កែម ឡី ដើម្បីជួយសម្រួលចរាចរណ៍។ នគរបាលចរាចរណ៍ទាំងអស់ ត្រូវឈរនៅក្រោមកំដៅថ្ងៃក្ដៅហែង មិនខុសអ្វីពីអ្នកចូលរួមហែសពឡើយ។ នៅផ្ទះកំណើតលោកបណ្ឌិត កែម ឡី ឯណោះវិញ អាជ្ញាធរខេត្តតាកែវ ក៏បានអញ្ជើញទៅធ្វើការគោរពសពផងដែរ។ ទាំងនេះបានសរបង្ហាញឲ្យឃើញយ៉ាងច្បាស់អំពីសាមគ្គីភាពនៅក្នុងសង្គមខ្មែរ ដែលជាក្ដីសង្ឃឹមនៃឯកភាពជាតិ។ ហើយវាទំនងជាអ្វីដែលលោកបណ្ឌិត កែម ឡី ចង់ឃើញដូចគ្នាដែរ នៅពេលលោកនៅមានជីវិត។ ប៉ុន្តែយ៉ាងណាក៏ដោយ សាមគ្គីភាពនេះ មិនគួរលេចឡើងតែក្នុងពេលទុក្ខសោកដូច្នេះទេ។ សាមគ្គីភាពក្នុងរវាងពលរដ្ឋខ្មែរ គួរតែមាននៅគ្រប់កាលៈទេសៈទាំងអស់ ជំនួសឲ្យភាពអាត្មានិយមដែលគេសង្កេតឃើញថាកើតមានជារៀងរាល់ថ្ងៃនៅក្នុងសង្គមកម្ពុជា។ក្រៅពីសាមគ្គីភាព ក្បួនហែសពលោកបណ្ឌិត កែម ឡី ក៏បានបញ្ជាក់ឲ្យឃើញផងដែរអំពីនិន្នាការរបស់ពលរដ្ឋខ្មែរគ្រប់ស្រទាប់វណ្ណៈ ដែលគោរពស្រឡាញ់បុគ្គលដែលប្រព្រឹត្តអំពើល្អ។ មានន័យថា ខ្មែរ យល់ និងចេះបែងចែកបានច្បាស់លាស់ណាស់រវាង សនិងខ្មៅ ឬ អំពើសុចរិតនិងអំពើទុច្ចរិត។ សង្គមខ្មែរ ផ្ដល់តម្លៃដល់អំពើល្អ ហើយស្អប់ខ្ពើមជាទីបំផុតអំពើអាក្រក់។ តាមរយៈភស្តុតាងទាំងអស់នេះ គេស្ទើរតែអាចនិយាយបានថា ចាប់ពីអំណេះតទៅ អ្នកប្រព្រឹត្តអំពើអាក្រក់ទំនងជាពិបាកនឹងឈរជើងជាប់ណាស់នៅក្នុងសង្គមកម្ពុជា៕
No comments:
Post a Comment